Şəhid polis serjantı Əsgərov Ələsgər Zakir oğlunun doğum günü qeyd olunub

"Konstitusiya və Suverenlik İli" çərçivəsində mayın 12-də Naxçıvan Şəhər İcra Hakimiyyətinin təşkilatçılığı ilə Naxçıvan Muxtar Respublikası Ali Məclisinin deputatlarının, Naxçıvan Muxtar Respublikası Daxili İşlər Nazirliyinin, Səfərbərlik və Hərbi Xidmətə Çağırış üzrə Dövlət Xidmətinin Naxçıvan şəhər idarəsinin, Naxçıvan Muxtar Respublikası Əmək və Əhalinin Sosial Müdafiəsi Nazirliyinin, Naxçıvan Şəhər Polis İdarəsinin, Naxçıvan Dövlət Univeristetinin, Yeni Azərbaycan Partiyası Naxçıvan şəhər təşkilatının kollektivlərinin iştirakı ilə tədbir keçirilib.

Tədbirdə Ümummilli Lider Heydər Əliyevin vətorpaqlarımızın ərazi bütövlüyü uğrunda şəhid olanların əziz xatirəsi sükutla yad edilib, ardınca Dövlət Himni səsləndirilib.
Naxçıvan Şəhər İcra Hakimiyyətinin Vətən müharibəsi iştirakçıları və şəhid ailələri ilə işin təşkili şöbəsinin müdiri İsmayl Gülməmmədov çıxış edərək 2023-cü il sentyabrın 19-a düşmənin terror əməliyyatına antiterror əməliyyatı ilə cavab verən ordumuzun, polislərimizin şücaətindən və qəhrəmanlığından danışıb. Bildirilib ki, Müzəffər Ali Baş Komandanımız İlham Əliyevin rəhbərliyi altında işğal altında olan torpaqlarımızda suverenliyimiz tam bərpa olundu.

Torpaqlarımızın ərazi bütövlüyünün təmin olunmasında biz hər birimiz şəhidlərimizə, qazilərimizə və ordumuza borcluyuq. İsmayıl Gülməmmədov bildirib ki, bu gün şəhid ailələrinə, qazilərə xüsusi diqqət və qayğı göstərilir, mənzil-məişət şəraiti yaxşılaşdırılır, qazilər avtomobil və işlə təmin edilirlər.

Sonra şəhid Mərhəmət Həmzəyevin anası Qərənfil Həmzəyeva, Ramazan Göydağlının atası Əbülfət Əliyev, Ülvi Cəfərovun atası Habil Cəfərov, Sabirabad rayonundan olan şəhid Əzizbəy Muradovun anası Fatma Muradova, Bakı şəhərindən olan şəhid Seymur Mahmudovun anası Gülnarə Mahmudova övladlarının vətənpərvərliyi ilə qürur duyduqlarını, şəhid ailələrinə göstərilən diqqət və qayğıya görə Cənab prezidentimiz İlham Əliyevə öz minnətdarlıqlarını bildiriblər.

Sonda şəhid Ələsgər Əsgərovun oxuduğu 5 nömrəli tam orta məktəbin şagirdləri və 12 nömrəli tam orta məktəbdə adına verilmiş 8 C sinfinin şagirdləri tərəfindən şəhidlərə həsr olunmuş şeirlər səsləndirilib.