Martın 13-də Naxçıvan Şəhər İcra Hakimiyyətinin təşkilatçılığı ilə Naxçıvan şəhəri Qaraxanbəyli kənd inzibati ərazi dairəsi üzrə nümayəndəliyin inzibati binasında “Ailə-kəndli təsərrüfatlarının genişləndirilməsi və kiçik sahibkarlıq subyektlərinə çevrilməsi”, “Kənd təsərrüfatı istehsalçıları arasında baramaçılığın və ipəkçiliyin inkişaf etdirilməsi” mövzularında maarifləndirici tədbir keçirilib.
Tədbirdə Naxçıvan Şəhər İcra Hakimiyyətinin, Naxçıvan Muxtar Respublikasının İqtisadiyyat Nazirliyinin, Naxçıvan Muxtar Respublikası Kənd Təsərrüfatı Nazirliyinin əməkdaşları və istehsalçılar iştirak edib.
Naxçıvan Şəhər İcra Hakimiyyətinin sektor müdiri Allahverdiyev İqbal giriş sözü ilə tədbiri açaraq keçirilən tədbirin mahiyyətindən danışıb. Daha sonra Naxçıvan Muxtar Respublikası Kənd Təsərrüfatı Nazirliyinin əməkdaşları Vüsal Süleymanov və Günel Məmmədova mövzular ətrafında çıxış ediblər.
Tədbirin keçirilməsində əsas məqsəd kənd təsərrüfatı məhsulları istehsalının artırılması, istehsalçılar arasında əməkdaşlıq imkanlarının genişləndirilməsi, qabaqcıl təcrübələrin bölüşdürülməsi, dövlət dəstək mexanizmləri hesabına sahibkarlıq subyektlərinə çevrilmə prosesinin stimullaşdırılmasıdır.
Sonda istehsalçıları maraqlandıran suallar ətraflı cavablandırılıb və baramaçılıq fəaliyyəti ilə məşğul olmaq istəyən təsərrüfatçılar haqqında müvafiq qeydiyyatlar aparıldı.
