Bu gün dünyada beynəlxalq məsələlərin, aktual problemlərin müzakirəsinə, həll yollarının tapılmasına həmişəkindən daha çox ehtiyac duyulur. Bu baxımdan qlobal problemlərin müzakirə olunduğu platformaların yaradılması və inkişaf etdirilməsi xüsusi əhəmiyyət daşıyır.
Azərbaycan Respublikasının Prezidenti İlham Əliyevin himayəsi altında və Nizami Gəncəvi Beynəlxalq Mərkəzinin təşkilatçılığı ilə 2013-cü ildən bəri hər il paytaxt Bakıda keçirilən Qlobal Forum da dünyanı narahat edən məsələlərin müzakirə edildiyi ən mühüm platformalardan biridir.
Martın 13-də Bakıda, “Gülüstan” sarayında “Dünya düzəninin yenidən düşünülməsi: Çağırışların fürsətə çevrilməsi” mövzusunda XII Qlobal Bakı Forumu işə başlayıb. Azərbaycan Respublikasının Prezidenti İlham Əliyev Forumun açılış mərasimində iştirak edərək çıxış edib. Dövlət başçısı Bakı Forumunun qlobal gündəlikdəki mühüm məsələlərin həllində aparıcı beynəlxalq platformalardan birinə çevrildiyini qeyd edib.
Nizami Gəncəvi Beynəlxalq Mərkəzi üzvlərinin ötən il Azərbaycanda əsas beynəlxalq tədbir olan COP29-da fəal iştirakını vurğulayan Prezident İlham Əliyev bildirib ki, biz həqiqətən çox fərəhlənirik ki, təxminən 200 ölkənin yekdil qərarı ilə seçildik. Bu, bizə olan hörmətin, etimadın təzahürü, eləcə də yaşıl keçid üzrə fəaliyyətimizə verilən qiymət idi. Digər mühüm nailiyyət ondan ibarət idi ki, Bakıda COP29-da bərpaolunan enerji layihələri üçün maliyyələşmənin əvvəlki 100 milyarddan 300 milyard dollara qədər artırılmasına nail olduq. Buna görə, Bakıdakı COP29 “Bakı sıçrayışı” adlandırıldı və bu, mühüm irsdir.
COP29 zamanı Azərbaycana qarşı geniş kampaniya aparılırdığını qeyd edən Prezident bildirib ki, əfsuslar olsun bu qlobal beynəlxalq tədbir bəzi Qərb medialarında kampaniya ilə müşayiət olundu. Bütün bunlar bir neçə mərkəzdən, əslində, ikisindən qaynaqlanırdı. Onlardan biri - ABŞ-ın Dövlət Departamenti idi. “Vaşinqton Post”, “Nyu-York Tayms”, “Politico”, “Newsveek” və “Assoşieyted Press” kimi yalan xəbər mənbələri, sadəcə, ABŞ Dövlət Departamentinin təlimatlarını icra edirdilər.
İkinci mənbə isə Fransa prezidentinin ofisi, cənab Makron, onların “Le Monde”, “Fiqaro” və digər bu kimi saxta xəbər mətbuatı idi. Bir sözlə, bu, COP29-un boykot edilməsinə yönəlmiş qarayaxma və böhtanın əlaqələndirilmiş kampaniyası idi.
Bu, elə bir siyasətdir ki, heç bir kəsə başucalığı gətirmir söyləyən ölkə başçısı qeyd edib ki, buna baxmayaraq, böyük tərkibdə iştirak oldu. Qeydiyyata alınmış 77 min iştirakçının sırasında 197 ölkədən təmsilçilər, 70 dövlət və hökumət başçısı var idi.
Prezident bildirib ki, Ermənistanın işğalı və təcavüzü nəticəsində Azərbaycan xalqının çəkdiyi əzab-əziyyətləri yaddan çıxara bilmərik və çıxarmayacağıq. Azad olunmuş ərazilərə səfər edənlər barbarlıq səviyyəsini görə bilər. Bütün şəhərlərimiz xarabalığa çevrilib. İndi isə onları yenidən tikirik. Hər bir şey yerlə-yeksan olunubdur və bu, kəndlərimizə, şəhərlərimizə qarşı bilərəkdən urbisid idi, dinimizə və tarixi irsimizə qarşı bilərəkdən zərbə idi. 65 məscid dağıdılıb və nəinki azərbaycanlıların, o cümlədən bütün dünya müsəlmanlarının hisslərini təhqir etmək üçün orada donuz və mal saxlayıblar. Bunu yaddan çıxarmayacağıq.
613 insanın, onlardan 60-dan çox uşağın və 100-dən artıq qadının ermənilər tərəfindən qətlə yetirildiyi Xocalı soyqırımını yaddan çıxarmayacağıq. Lakin, eyni zamanda, gələcəyə nəzər salmalıyıq. Cənubi Qafqazda sülhə nail olmalıyıq. Bu baxımdan, Azərbaycan sülh prosesinin təşəbbüskarı olub. Əslində, Azərbaycan hətta bu gün Ermənistanla müzakirə olunan və əsasən razılaşdırılmış sülh sazişi layihəsinin, həmin sülh müqaviləsinin müəllifidir. Bəndlərin əksər hissəsi razılaşdırılıbdır.
Antoni Blinkenin Azərbaycana aid siyasətinin əslində, 30 il qurduğumuz ABŞ-Azərbaycan münasibətlərini heçə endirdiyini qeyd edən Prezident İlham Əliyev bildirib ki, ümid edirik yeni Administrasiya ilə regionumuzun müasir inkişafı üçün hər zaman vacib olmuş güclü tərəfdaşlığımızı yenidən quracağıq.
Qeyd edək ki, üç gün davam edən XII Qlobal Bakı Forumu martın 15-də işini yekunlaşdırıb. Tədbirdə 60 ölkədən 300-dən çox nüfuzlu siyasətçi iştirak edib.
.jpeg)
