Novruz bayramı ərəfəsində Naxçıvan şəhərində yerləşən qəbiristanlıqlarda təmizlik işləri aparılıb

Xalqımıza məxsus milli dəyərlər və adət-ənənələrin əsasında vətənpərvərlik, saflıq və xeyirxahlıq kimi əməllər dayanır. Naxçıvanda insanlar bu gün də milli-mənəvi dəyərlərimizə və adət-ənənələrimizə hörmətlə yanaşır, mənəvi saflıq və həmrəylik nümayiş etdirirlər. Dini dəyərlərimizə uyğun olaraq, Naxçıvan şəhəri ərazisindəki qəbiristanlıqlarda təmizlik aksiyasının keçirilməsi də bu tədbirlərin davamı kimi mühüm əhəmiyyətə malikdir. 

Naxçıvan Şəhər İcra Hakimiyyəti və tabeli qurumların iştirakı ilə mart ayının ilk günlərindən başlayaraq Naxçıvan şəhərində yerləşən qəbiristanlıqlarda genişmiqyaslı təmizlik və abadlıq işləri həyata keçirilmişdir. Belə ki, ənənəvi olaraq ildə bir neçə dəfə təşkil olunan təmizlik aksiyası çərçivəsində məzarlıqların ətrafı səliqəyə salınıb, otlar və kol-kos təmizlənib.

Qeyd edək ki, bu cür aksiyalar Naxçıvan şəhərində davamlı olaraq keçirilir və ictimaiyyət tərəfindən müsbət qarşılanır. Məqsəd məzarlıqların abad saxlanılması və ətraf mühitin qorunmasıdır.