İyunun 13-də Naxçıvan Muxtar Respublikasının Nazirlər Kabineti, Azərbaycan Milli Elmlər Akademiyası, AMEA Naxçıvan Bölməsi, Qərbi Azərbaycan İcması, Naxçıvan Dövlət Universiteti və AMEA A.A.Bakıxanov adına Tarix və Etnologiya İnstitutunun birgə təşkilatçılığı ilə “Qərbi Azərbaycan: tarixi, mədəniyyəti və böyük qayıdış” Respublika Elmi Konfransı keçirilib.
Konfrans iştirakçıları əvvəlcə Ümummilli Lider Heydər Əliyevin Naxçıvan şəhərindəki abidəsi önünə gül dəstələri qoyub, sonra Heydər Əliyev Muzeyi ziyarət edilib.
Daha sonra AMEA Naxçıvan Bölməsinin Elmi Kitabxanasında Qərbi Azərbaycanla bağlı təşkil olunmuş sərgiyə baxış keçirilib.
Konfransın plenar iclası Naxçıvan Şəhər İcra Hakimiyyətinin iclas zalında davam edib. İclasda Naxçıvan Şəhər İcra Hakimiyyəti başçısının birinci müavini Əhməd Vəliyev də iştirak edib.
Qeyd edək ki, konfrans öz işini günün ikinci yarısında 5 bölmə iclası üzrə davam etdirib, bölmə iclaslarında ümumilikdə 61 elmi məruzə təqdim olunub.
