Milli adət-ənənələrimizin qorunması və gələcək nəsillərə ötürülməsi istiqamətində həyata keçirilən tədbirlər çərçivəsində Naxçıvan şəhər 1 nömrəli tam orta məktəbdə Xıdır Nəbi bayramı münasibətilə tədbir təşkil olunub.
Tədbirin keçirilməsində əsas məqsəd uşaqlara xalqımızın zəngin milli-mənəvi dəyərlərini aşılamaq, qədim inanclarımız və mərasimlərimiz haqqında ilkin təsəvvür formalaşdırmaq, onlarda milli kimlik və vətənpərvərlik hisslərini gücləndirmək olub.
Bayram proqramı çərçivəsində uşaqlar Xıdır Nəbi ilə bağlı şeirlər söyləyib, mahnılar ifa edib, səhnəciklər nümayiş etdiriblər. Tədbir zamanı milli atributlar, ənənəvi süfrə nümunələri və qədim mərasim elementləri nümayiş olunub, uşaqlara bayramın mahiyyəti və xalq təfəkküründəki yeri barədə məlumat verilib.
Şagirdlərin fəal iştirakı və yüksək əhval-ruhiyyəsi tədbirə xüsusi rəng qatıb, milli adət-ənənələrimizin yaşadılmasının vacibliyini bir daha nümayiş etdirib. Bu cür tədbirlər uşaqlarda həm milli dəyərlərə bağlılıq hissini möhkəmləndirir, həm də onların sosial bacarıqlarının inkişafına müsbət təsir göstərir.
